XCIV.

[1] Romam te uenturum certa fama promiserat: spem uisendae praestantiae tuae multo gaudio ceperamus, sed inprouiso mutatus nuntius indicauit quod pio accitu domini et principis nostri ad uotiua remeares. Ergo officium salutationis quod coram speraueram deferendum stili honore compenso teque oro ut ingrauatam uicem referas, quae suadeat desiderari ex me crebra conloquia, si ostenderit prima placuisse. Vale.