LI. AD APOLLODORVM

[1] Quintus et Felix Hipponensium curiales has de me litteras summatibus uiris interuenientibus inpetrarunt: debui enim probitatem hominum de testibus aestimare. Interest igitur amicitiae nostrae ne spes eorum qui me ad inpetrationem ualidum crediderunt decepta uideatur. Quare, si quid eorum poscet utilitas, benignitatem adde iustitiae. Credo enim talia esse poscenda quae nec interuenientis petitionem nec praestantis iudicium decolorent. Vale.