LXVIII. SYMMACHVS TITIANO

[1] Desideratas quidem litteras tuas libens sumpsi, sed cognitio actuum tuorum quorum testis atque narrator Euscius fuit uberiorem mihi adtulit uoluptatem. Itaque hortor ac moneo ut bene coepta non deseras et praemium laudis honestate secteris. Subiungerem curam meorum, si mihi esset alius adloquendus, sed cum facias ultro quae meus sermo posset expetere, partes commendationis omitto; quia quidquid ex fiducia amicitiae praesumitur, plus habet gratiae, si sponte praestetur. Vale.