CXII. SYMMACHVS PATRVINO

[1] Cum tibi omnium meorum cura praecipua sit, praesumo filio meo Arcentio spectabili uiro quem mihi iungit adfinitas intimam familiaritatem tuam posse reserari, quam merito illi et uitae decus et familiae conciliat antiquitas. His propriis eius bonis etiam meae preces in augmentum commendationis accedunt, ut plane dubitare non possim cumulatius ei et meum testimonium et tuum iudicium profuturum. Vale.