LX. SYMMACHVS PATERNO

[1] Omnes qui aditu tuo cupiunt subleuari, non cassam, quantum arbitror, uiam capessunt ineundae gratiae, cum me adstipulatore nitantur. Horum unus uir probabilis Turasius familiaris meus qui indictae sibi litis iniuriam fortunae imputat, gratiam uero boni reditus de tuo potissimum sperat auxilio. Tuere igitur aequa poscentem et humanitatis tuae latius extende famam quae incrementis maximis cumulabitur, si Turasio per te secunda successerint. Vale.